Manuel Lugrís Freire 4

O vento zoa

O vento zoa
nas outas lumieiras,
e do pinal viciño
óucese a fonda queixa.

Toquenando co sono
na lareira
están os cativiños
e namentras a nai salouca e reza.

O vento zoa
nas removidas tellas;
a saraiba inverniza
dun curisco, apredrea.

As ferintes saudades
medoñentas
nas almas arrequecen...
e namentras a nai salouca e reza.

O vento zoa
e unha cantiga enxerga
que de saudosos tempos xa pasados
as lembranzas esperta;

mais pensando no fillo
que levaran á guerra,
espello de aquel home
a nai, triste e dorida,
xa morto en terra allea,
xa non reza
porque coida que o vento
xeme tamén nas outas lumieiras
con laios tan firentes
como os dela.

"Ardencias", Manuel Lugrís Freire 

(Manuel Lugrís Freire nasceu no dia 11 de Fevereiro de 1863. Morreu em 1940.)

Manuel Lugrís Freire 2

Envexa

Praia de Gandarío,

Longa, triste, deserta,

Onde as ondas mainiñas

con solermia se deitan;

As tuas augas gardan

Daquela doce nena

A lembranza de groria

Da sua espida beleza.

Augas de Gandarío,

Calade o nome dela,

E non digades nunca

Que por vós sinto envexa.

"Ardencias", Manuel Lugrís Freire 

(Manuel Lugrís Freire nasceu no dia 11 de Fevereiro de 1863. Morreu em 1940.)