Xosemaría Pérez Parallé 2

O esconxuro da queimada

Lume lumiña
que verde camiña
da fraga á lareira
e faise lumieira.
Lume de quentura
pra nosa fartura;
lume benzoada
que roda a queimada.

Pingota de orballo
folla de carballo;
auga do agoiro
mel do fervedoiro.
Cerqueira de lume,
sin trasno nin fume;
nin bruxa chuchona,
nin meiga dentona.

Rolar muiñeiro,
chiscar faisqueiro;
moxena lumiosa,
vagalume rosa;
viradoira de lus
faremos a crus.

Polo ar da sorte
que escorrenta a morte;
pola auga da vida
que sanda a ferida;
pola herba moura que busca a tesoura;
pola pedra do raio que mata ao meigallo.

Lume, lume, lume;
lume lumeada
para aloumiñar
a queimada queimada,
na vira virada
do borburellar.

Polo San Silvestre
de pao de cipestre
chaga de San Roque,
can e palitroque.
Polo San Andrés
e, polo Sant-Iago, nun reviravés,
queimada che fago,
e queimada es.

"Poemas e Cantigas", Xosemaría Pérez Parallé

(Xosemaría Pérez Parallé nasceu no dia 4 de Agosto de 1909. Morreu em 1987.)

Xosemaría Pérez Parallé

Padrón 

Cheguei un dia a Padrón,
nel quedoime e non me pesa;
prendéuseme o corazón
no van dunha padronesa.

Padrón, Padrón,
a rula rolaba
no meu corazón.

Padronesa pimenteira,
nas hortas verdes do rio
prendícheme, fachuqueira,
co brínguelo laborío.

Padrón, Padrón,
a pomba zurea
no meu corazón.

A Padrón cheguei un dia
romeiro dunha promesa;
prendinme na picantía
dunha moza padronesa.

Padrón, Padrón,
un verso cantaba
no meu corazón. 

Xosemaría Pérez Parallé 

(Xosemaría Pérez Parallé nasceu no dia 4 de Agosto de 1909. Morreu em 1987.)