Daniel Cortezón 5

¡Enterrade aos mortos, enterrade tamén aos vivos que están mortos e aos mortos que parecen vivos, apodrecendo-o todo!... ¡Esta terra cheira a cadaverina! ¡Dígovo-lo outra vez: somos ás parellas a Santa Compaña e as Xans, todos nós tripando por todos os camiños, e todos nós levamos o noso cadaleito ao lombo, coma os ofertados da Puebla do Caramiñal! 

"A Vila Sulagada", Daniel Cortezón

(Daniel Cortezón nasceu no dia 6 de Fevereiro de 1927. Morreu em 2009.)

Daniel Cortezón 4

Moitos séculos de saber rir-se sotabarba, sotovoce, de coñecer os segredos do riso interno, do rir no ámago do esprito, entre as entreteas e a entrecodia da impotenza e da resistenza vidal. Coñecían a gran sabedoría: rir-se de todo, ficando perfectamente serios. Non era un arte, era unha cencia. As veces rian mentres choraban ou ao revés.

"A Vila Sulagada", Daniel Cortezón

(Daniel Cortezón nasceu no dia 6 de Fevereiro de 1927. Morreu em 2009.)

Daniel Cortezón 3

Adoitan sere equilibrados, pero sempre a custa de permanecer á defensiva, dispostos a sobrevivir ao nemigo, non a bater-lo. Sospeitan sempre. Cecais por eso non poden soster a tensión vidal e, como foi dito, entolecen de maneira súpeta, adoecen, matan ou suicídan-se.

"A Vila Sulagada", Daniel Cortezón

(Daniel Cortezón nasceu no dia 6 de Fevereiro de 1927. Morreu em 2009.)

Daniel Cortezón 2

E os obreiros, encandeados, asubiaban ao pasar.
- Asubía-lle a tua nai - respondían-lles elas; inda que satisfeitas no fundo, facendo-lles faiscas os ollos, coma pequenas fuxeiras. E eles, xornentes:
- Eis, rapaza. Te-la condición do tordo: cara fina e cu gordo.
Elas rían-se polo baixo. E as mais, na casa, revellidas, rifando, encrenchadas:
- Moito coidado có que fas: eses veñen e van.
- As de aquí son para os de aquí. Sempre foi así.

"A Vila Sulagada", Daniel Cortezón

(Daniel Cortezón nasceu no dia 6 de Fevereiro de 1927. Morreu no dia 4 de Outubro de 2009.)

Daniel Cortezón

Hai miñotas do outo, do meio e do curso inferior del. Ao Norde e ao Sul, ficaban algun tempo - e inda agora - as terras dos baluros, xente bafu, nefaria, apauliñada e avol, feiticeira e doada aos meigallos e ás artes malignas, aldraxados de todos como nemigos da saúde do esprito e da salvazon da alma; verdadeiro pobo maldito, como os agotes, os chuetas, os vaqueiros de alzada, os maragatos ou os pasiegos, xente gafa e préscita doutras latitudes. Nembargantes, polo xeral son liricamente lenes, salaiantes, boentes, amadoiros e sentimentais; inda que as vegadas estalen, como o rio , en paixons homicidas e feitos terríbeis e absurdos. Esto sober todo: as vegadas voltanse profundamente ilóxicos, celobremente existenciais e irracionais, o cal enche a sua vida dun contido angurioso e os situa nesa encosta do anormal, do máxico e, tamén, do teratolóxico, chea de posibilidades insospeitadas encol da xustificazón do ser do home. Tamén creen nas pantasmas. Teñ[en] medo.

"A Vila Sulagada", Daniel Cortezón

(Daniel Cortezón nasceu no dia 6 de Fevereiro de 1927. Morreu em 2009.)