Celestino Cabarcos Suárez

O bastón do alcalde

Aló nas terras de Arzúa,

no distrito da Cañiza,

hai un alcalde pavero

cal non hai outro en Galicia.

Xa lles contara este conto

nunha revista arxentina

ós nosos irmaos galegos

pra lles saca-la morriña.

Empezaba así o conto

que eu lles contei aquel día:

Éralle grande o bastón

ó alcalde da Cañiza.

O bastón éralle grande...

(hai moito deso en Galicia)

e chamou un carpinteiro

e díxolle: Abanista

fágolle saber a ustede

que antes de te-la vista

do deputado, que ha de vir

neste mes de aquí, á Cañiza,

ten que arreglarme o bastón,

que me é algo grande por riba.

- Descuide señor alcalde,

que o poñerei á medida...

O carpinteiro espuntou

o pao aquel enseguida,

e levoullo ó alcalde

antes de que houbera a visita.

Mais este armou as do demo,

con virlle todo á medida.

- So, bruto, que aquí fixeche!

Estabas xordo aquel día?

- Señor alcalde serénese.

Ou non lle vén á medida?

- Que medida nin que raio!

Vaia un burro de ebanista,

que lle vai quitar por baixo

séndome grande por riba!...

 

"Cóxegas", Celestino Cabarcos Suárez

(Celestino Cabarcos Suárez nasceu no dia 14 de Maio de 1883. Morreu em 1961.)