Manuel Antonio 5

Intencións

Encheremos as velas
coa luz náufraga da madrugada
Pendurando en dous puntos cardinais
a randeeira esguía
do pailebote branco.
Coas suas mans loiras
acenan mil adeuses as estrelas. 

Inventaremos frustradas descubertas
a barlovento dos horizontes
para acelerar os abolidos corazóns
dos nosos veleiros defraudados. 

Halaremos polo chicote 
dun meridiano innumerado 

Na illa anónima
de cada singradura
esculcaremos o remorso da cidade 

Ela noctámbula desfollará
como unha margarida prostibularia
a Rosa dos Ventos do noso corazón. 

Encadearemos adeuses de escuma
pra tódalas prayas perdidas
Xuntaremos cuardernos en branco
d' a novela errante do vento
Pescaremos na rede dos atlas
ronseles de Simbad 

E cazaremos a vela
sobre o torso rebelde das tormentas
pra trincar a escota dunha ilusión.

"De Catro a Catro", Manuel Antonio

(Manuel Antonio nasceu no dia 12 de Julho de 1900. Morreu em 1930.)

Aquilino Iglesia Alvariño 7

Manuel Antonio

Por un mar verde de oucas
levara o seu barco a toas.
Ai, noso amigo!
Nun mar de oucas verdegado
boyara a toas o barco.
Ai, noso amigo,
capitán de alto navío!

Crara estrela, a súa gamela
noviña foise coa néboa.
Ai, noso amigo!
E aquela frol dos naufraxios
desfollouse contra os fachos.
Ai, noso amigo,
capitán de alto navío!

Noviña foise coas sombras,
sin vento, ó correr das ondas.
Ai, noso amigo!
Desfollouse contra os fachos
de noite, DE CATRO A CATRO.
Ai, noso amigo,
capitán de alto navío!

"Nenias", Aquilino Iglesia Alvariño

(Aquilino Iglesia Alvariño nasceu no dia 12 de Junho de 1909. Morreu em 1961.)

Manuel Antonio 4

Os cóbados no varandal

Atopamos esta madrugada 
na gaiola do Mar 
unha illa perdida

Armaremos de novo a gaiola
Vai a saír o Sol
improvisado e desorientado

Xa temos tantas estrelas
e tantas luas submisas
que non caben no barco nin na noite

Xuntaremos paxaros sen xeografía
para xogar cas distancias
das suas áas amplexadoras

E os adeuses das nubes 
mudos e irremediabes

E armaremos unha rede de ronseles
para recobrar as saudades
coa sua viaxe feita
polos océanos do noso corazón.

"De Catro a Catro", Manuel Antonio

(Manuel Antonio nasceu no dia 12 de Julho de 1900. Morreu em 1930.)

Manuel Antonio 3

Navy Bar

Este bar ten balances
E tamén está listo
pra se facer á vela

Enchéronnos o vaso
con toda a auga do Mar
pra compor un cocktail de horizontes

Pendurados das horas
atlas xeográfico de esperantos
están sen tradución
E tatexan as pipas
co ademán políglota das bandeiras

Ese cantar improvisado
é o mesmo
que xa se improvisou nalgures

Quen chegou avisándonos
desa cita nocturna que temos
co vento ao NE
na encrucillada das estrelas apagadas?

Aquí bebe de incógnito
o Mariñeiro Desconecido
- sen xeografía nin literatura -
A noite dos naufraxios
co seu brazo salvavidas
aferrará connosco unha vela de chuvascos

O vaso derradeiro
estaba cheo de despedidas 

Polas rúas dispersas
íamonos fechando
cada un dentro da súa alta mar

No repouso dalgún vaso
tódalas noites naufraga o Bar.

"De Catro a Catro", Manuel Antonio

(Manuel Antonio nasceu no dia 12 de Julho de 1900. Morreu em 1930.)

Manuel Antonio 2

Sós

Fomos ficando sós
o Mar o barco e máis nós

Roubáronnos o Sol
O paquebote esmaltado
que cosía con liñas de fume
áxiles cadros sin marco

Roubáronnos o vento
Aquel veleiro que se evadéu
pola corda floxa do horizonte.

Este océano desatracóu das costas
e os ventos da Roseta
ourentaronse ao esquenzo.
As nosas soedades
veñen de tan lonxe
como as horas do reloxe
Pero tamén sabemos a maniobra
dos navíos que fondean
a sotavento dunha singladura.

No cuadrante estantío das estrelas
ficóu parada esta hora:
O cadavre do Mar
fixo do barco un cadaleito.

Fume da pipa Saudade
Noite Silenzo Frío
E ficamos nós sós
sin o Mar e sin o barco
nós.

"De Catro a Catro", Manuel Antonio

(Manuel Antonio nasceu no dia 12 de Julho de 1900. Morreu em 1930.)

Manuel Antonio

Intencións

Encheremos as velas
coa luz náufraga da madrugada

Pendurando en dous puntos cardinais
a randeeira esguía
do pailebote branco

Coas suas mans loiras
acenan mil adeuses as estrelas

Inventaremos frustradas descobertas
a barlovento dos horizontes
pra acelerar os abolidos corazóns
dos nosos veleiros defraudados

Halaremos polo chicote
dun meridiano innumerado

Na illa anónima
de cada singradura
esculcaremos o remorso da cidade

Ela noctámbula esfollará
como unha margarida prostibularia
a Rosa dos Ventos do noso corazón

Encadearemos adeuses de escuma
para tódalas praias perdidas
Xuntaremos cadernos en branco
da novela errante do vento
Pescaremos na rede dos atlas
ronseis de Simbad

E cazaremos a vela
sobre o torso rebelde das tormentas
para trincar a escota dunha ilusión.
 
"De Catro a Catro", Manuel Antonio

(Manuel Antonio nasceu no dia 12 de Julho de 1900. Morreu em 1930.)