Paco Souto 4

Metamorfose

vivo nun país de marea baixa

entre argazos e agullas de coral

construímos a ilusión do solpor

mentres

o sol debruza con quietude

os seus pés

na lagoa da tarde

de enchermos a lúa

o noso país cativo

afogaría en sal océana

apenas é un baixo a romper

a pedra azul das augas

un salseiro de cobalto

sen terra para a labranza

sen augas de beber

sen respiro apenas

só nos queda arrincar a pel

e que veñan as escamas

empeñar brazos e pernas por aletas

e iluminar

coa tuberculose

as galadas que nos dean alento

maradentro

"e Caín", Paco Souto

(Paco Souto nasceu no dia 12 de Outubro de 1962. Morreu em 2017.)

Paco Souto 3

amado Xonás

saímos á noite
por comer do escuro canta luz
quixemos posuír
carne de auga eramos mar abaixo
voces de lúa
pegando aínda
no farol de proa
na gamela enchida de florestas
dedos eramos
polos precipicios da carne
aonde caer obsesivamente moribundos
acesos surtidores de balea
iniciaron nas ondas vixiantes
aquela sorte de naufraxio voluntario
como morremos entón Xonás
na boca enorme do pecado

"e Caín", Paco Souto

(Paco Souto nasceu no dia 12 de Outubro de 1962. Morreu em 2017.)

Paco Souto

autorretrato
 
escribo
en folla impar
as tres cuartas partes
xustas
de min mesmo
a man acenando o universo
a viaxe impar de virme paradentro

escribo tolo
un sexto apenas da ousadía
do que calo

inspiro
e dialógome

o meu mundo sempre será varios

"e Caín", Paco Souto

(Paco Souto nasceu no dia 12 de Outubro de 1962. Morreu no passado dia 30 de Março.)