Luís Amado Carballo 3

As cantigas do berce

Un carrizo namorado
afogóuse nun luceiro;
chora o monte y-a campía,
de loito vistius'o vento.

Como un paxariño horfo
nas mans morréusem'o día,
arrechegueino ao meu peito
por ver si lle daba a vida.

Vaite choiva e vente sol
qu'imos á xogar â leira
cô moneco bonitiño
que meu pai trouxo da feira.

Aquil berce está valeiro
y-a naiciña anda a chorar,
o meniño está no ceo
coas estrelas a brincar.

A campía escurecida
chora tremando co frío,
a probiña quedóu horfa
qu'o día afogóu no río.

"O Galo", Luís Amado Carballo

(Luís Amado Carballo nasceu no dia 2 de Maio de 1901. Morreu em 1927.)

Luís Amado Carballo 2

Lúa

A lúa é velliña,
de brancos cabelos,
de enrugas de ouro
e de olliños cegos.

Érguese do leito
das folas do mar
palpando os espazos
para camiñar.

Anda polo mundo
sin ver a onde vai,
pois as estreliñas
lévana na man.

Envolveita en néboas
hase de abrigar,
pois como vai vella
tense de coidar.

Cando na outa noite
brúa o temporal,
a lúa entre as tebras
tápase a tremar.

E así que o mal tempo
amainado vai,
asoma a faciana
i espalla o luar.

"O Galo", Luís Amado Carballo

(Luís Amado Carballo nasceu no dia 2 de Maio de 1901. Morreu em 1927.)